കൃതിയുമകൃതിയും
കൃതിയതു പോരെന്നാമോ കൃതിക്കും
ആ കൃതി മോശം, പഴക്കം?
പുസ്തകത്താളില്‍ നിന്‍ സ്കെച്ചുകള്‍
ചേരാതെ വിങ്ങുന്നു ചോക്കുന്നു മാനം
മുട്ടാനുരുളാന്‍ അരുള്‍കൂടുമാനന്ദ
നദിയിലറങ്ങാന്‍ ഭൂമമഭൗമമാ വക്ഷസ്സി
ചേരുവാന്‍ നന്‍കൃതിവികൃതികള്‍
പാര്‍ക്കുവാനോര്‍ക്കുവാന്‍ കാമാക്ഷിയക്ഷി
യന്‍പുള്‍ സഹദയിന്‍ ക്രീഡാരഹസ്യങ്ങള്‍
സ്നാനവിശേഷങ്ങളറിയുവാന്‍
സ്നിഗ്ദ്ധമാമായിടെച്ചേരുവാന്‍
മുത്തം നുകരുവാന്‍ മുകരുവാന്‍ ചുണ്ടുകള്‍
പ്രാണീജനം വന്നു തിങ്ങും വനങ്ങളാണെങ്ങും
കഷ്ടതകാലനൂര്‍ പോയിതിരയുന്നു
കാലനാര്‍? പാക്കനാര്‍ വെട്ടിയിട്ടോരോ
വഴികളില്‍ പാക്കുവെട്ടിക്കളിക്കുന്ന ജാതികള്‍
ജാതികെട്ടുന്ന ജാതകവഴികളെ, വാദനിരകളെ
സ്പര്‍ദ്ദയെ, ചീഞ്ഞജഡാകാരമൂര്‍ത്തിയെ
വെന്നു ശിവമയസന്ധ്യയില്‍ ഏതയല്‍ക്കൂട്ടവും
ചേരുമിടങ്ങളെ ചേരാതെയാക്കും ജഡിതവാദങ്ങളെ
ചോരപുരണ്ട ശസ്ത്രങ്ങളെ, ശല്യതന്ത്രങ്ങളെവെന്നു
പൂണുരുണ്ടാ പുകള്‍ ചൂഴുമുടലിനെ
ചലനസൗകുമാര്യങ്ങളെത്തന്നെയും
ത്രസിപ്പും മിടിപ്പുമിണ്ടല്‍ചേര്‍ന്ന കിടപ്പും
അന്യോന്യമുള്ള കുടിപ്പും കിടപ്പുമടയ്ക്കും
പൂണൂലുകള്‍ മേനിയില്‍ നിന്നും കളഞ്ഞു
കാമനാമോക്ഷവഴികളില്‍ സഞ്ചരിക്കുമുടല്‍കളെ
വെഞ്ചെരിക്കണോ വെണ്‍ചിതല്‍പറ്റങ്ങള്‍?
മെക്കാപ്പുഴനീന്തി മയിലുകളാടിനില്‍ക്കും കളങ്ങളില്‍
വെക്കണോ വീണ്ടും ജയില്‍പ്പുഴ
മരണമാരണരണങ്ങളും? വന്നടുക്കൂ
ഉടലുടല്‍ ചേര്‍ന്നാടിയൊച്ചകള്‍
ശീല്ക്കാരം മൃദുസ്പര്‍ശം മുലക്കണ്ണിന്‍
ചുരുള്‍വിട്ടു പോരുമൊഴുക്കുകളന്‍പുകള്‍
ഒക്കെയൊഴിക്കും ചോരക്കളങ്ങളില്‍
ചോരശാസ്ത്രങ്ങളില്‍ തസ്കരപ്രമാണങ്ങള്‍
വാണവുംകൂടി മുടക്കുവാനുടലിന്നുവേവിനാല്‍
വേലകളാലനവധിബിംബപ്രമാണക്കുരിശടികളാല്‍
തമ്മാമ്മിലണചേര്‍ന്ന ജീവല്‍പ്രമാണങ്ങളെക്കൂടി
യരയുംതലയുംമുറുക്കിക്കുവാന്‍ നോക്കു
മാര്യവെപ്പിന്‍ ഉടല്‍വേപ്പുകള്‍ക്കൂടി
യൊഴിക്കും ദൈവത്തോടുവേണോ പകയും വൈരാഗ്യവും?
സ്നേഹമാണഖിലസാരമൂഴിയില്‍/ മുക്കണോവഞ്ചി,
കരയ്ക്കണയ്ക്കണോ?
ആശയഗംഭീരമേതുതീരവും ഭവാനിയും
ഭാവനാമാര്‍ഗ്ഗങ്ങളുമിനിമേല്‍ ഗുപ്തമല്ലേതും
ഉപഗുപ്തനാനന്ദനായ് നില്‍ക്കുമിടങ്ങളില്‍!
posted by BENOY P.J @ February 20, 2019
0 Comments
0 Comments:
Post a Comment
Subscribe to Post Comments [Atom]
<< Home