കഞ്ചാവ് തോട്ടം

വേട്ടക്കാര്‍ വന്നെന്‍റ കഞ്ചാവു ചെടിയെ
വല്ലാതെ വേട്ടയാടി
അഞ്ചിതളുള്ളവളല്ലേ
യവളെന്‍റ പുന്നാര പൂങ്കുരുന്നല്ലേ
നല്ല പുകയാലകവും പുറവും
നിറച്ചെന്നെയൂട്ടുന്നോളല്ലേ
കാക്കിയുടുപ്പിട്ട വീരന്മാര്‍ക്കൊക്കെയും
കാല്‍ക്കാശു നല്‍കുന്നോളല്ലേ
നേര്‍ത്തസ്വപ്നങ്ങളെന്‍ നെഞ്ചിില്‍ കൊരുത്തിട്ടു
ചങ്കിനെ പോറ്റുവോളല്ലേ
ഏതോ ദിക്കില്‍ നിന്നുമിങ്ങു വന്നെത്തിയെന്‍
മുറ്റത്തു വീണവളല്ലേ
സൂര്യനെ ചാലിച്ചു ചേര്‍ത്തെന്‍റ
യുള്ളിലെ കള്ളു പുളിപ്പിച്ചോളല്ലേ
ഏതു നാട്ടില്‍ നിന്നും ആര്‍ക്കും പകരുവാന്‍
ഉള്ളിലെ വീഞ്ഞുള്ളോളല്ലേ
വേട്ടയൊടുങ്ങുമ്പോള്‍ ലോകത്തെ വേള്‍ക്കുവാന്‍
പ്രാപ്തിയുള്ളോളവളല്ലേ!